Nahimong sentro sa panagtagbo sa BFP-Malaybalay, LTO, ug Traffic Management Center (TMC) ang pagpahamtang og tulo hangto siyam ka bulan nga suspensyon sa lisensya batok sa mga driver nga dili mohatag og dalan sa mga emergency vehicles.
Sa esklusibong pakighinabi sa Juander Radyo Malaybalay, gipadayag ni FO3 Brent Clyde N. Suico, Media Relations Officer sa BFP Malaybalay, nga ilang gibisita ang buhatan ni LTO Malaybalay District Office Head Juntelie T. Goc-ong, diin gihisgutan ang dinaliang pagpatuman sa RA 9514 ug RA 4136 aron matangtang ang mga babag sa dalan panahon sa emerhensiya.
Ang maong hiniusang lakang gilusad tungod sa nagkagrabe nga problema sa mga BFP personel, diin daghang mga motorista ang magdumili gihapon sa pagpadaplin bisan og nagtingog na ang siren. Pinaagi niini, mas mapalig-on ang koordinasyon sa matag ahensya sa pagdakop ug pag-monitor sa mga malapason nga nakapabalda sa paspas nga pagresponde sa mga bombero ug rescue teams.
Dugang pa ni Suico, ang pagpahamtang og bug-at nga silot maoy tubag sa problema sa “obstruction to fire operations” nga sagad makalangan sa ilang serbisyo. Gilauman nga pinaagi sa maong pagtinabangay sa LTO ug lokal nga trapiko, mas masiguro ang kaluwasan sa publiko ug mapaspasan ang pagluwas sa mga kabtangan panahon sa emerhensya sa dakbayan sa Malaybalay.
Photo Courtesy: Istock
