Gidasig sa mga gynecologic oncologists ang mga kababayen-an nga magpa checkup ug magpa-screening kanunay aron malikayan ug masayran dayon ang sakit nga cancer sa reproductive system.
Matod pa ni Dr. Chandra Salvador, Head of the OB-Gyne Department of the Zamboanga del Sur Medical Center (ZDSMC) importante nga hatagan ug bili ang sayong pagpa screening tungod kay mas dako ang tsansa sa pagkaayo kung kini masayran sa sayong bahin.
Gipahinumduman usab niya ang tanan sa paglikay sa bisyo, pagmintinar sa kahimsog nga panglawas, ug pagpa-bakuna batok sa HPV gumikan makatabang kini sa pagpakunhod sa risgo sa cancer.
Kinahanglan matod pa nga dili mahadlok magpakonsulta sa doktor ug magpa checkup, ilabi na kung adunay gibating sintomas sa maong mga sakit.
Ang maong panawagan kabahin sa padayon nga kampanya sa health sector aron mapalambo ang kahibalo sa publiko ug mapanalipdan ang panglawas sa kababayen-an ilabina ning pagsaulog sa National Women’s Month.
