Nasakmit sa mga otoridad ang usa ka motorized bangka nga gikatahong loaded sa mga smuggled nga mga sigarilyo sa may Barangay Kawit, Pagadian City, sayo sa kadlawon, Marso 18, 2026.
Ang operasyon gihimo isip hiniusang lakang sa pagpanguna sa 53rd Infantry MATAPAT Battalion, Pagadian City Police Station, Zamboanga del Sur Maritime Police Station hinungdan sa malampusong pagkadakop sa pito ka mga tripulante.
Segon sa taho, samtang nagpatrolya sa baybayon sa maong barangay ang mga otoridad ilang namatikdan ang kadudahang bangka nga may markang MB PANDUDUK BARMM 7417-432.
Sa dihang gi-verify sa mga otoridad ang maong bangka ilang nakita ang karga niining ubay-ubayng mga kinahon sa mga smuggled nga mga sigarilyo nga dayon sab nilang gikumpiska.
Human sa operasyon, gidala sa mga operatiba ang maong bangka ngadto sa PNP Maritime Station sa syudad sa Pagadian samtang naghulat sa dugang pang mga proseso.
Samtang ang pito ka mga tripulante ug ang mga nabawing mga sigarilyo gikustudiya na sa Pagadian City Police Station alang sa imbestigasyon ug posibleng pagpasaka og kaso.
