Pormal nang gi-turnover sa Department of Trade and Industry – Zamboanga del Sur ang Shared Service Facilities (SSF) project nga nagkantidad og kapin ₱160,000 ngadto sa Local Government Unit sa Midsalip atol sa Ceremonial turnover nga gipahigayon bag-ohay pa lamang.
Ang kalihokan gipangulohan ni DTI Zamboanga del Sur Provincial Director Marlon A. Alabata uban ni Elvis Q. Dablo, Chief sa Business Development Division, ug uban pang kawani sa DTI.
Napormal ang pagbalhin sa proyekto pinaagi sa pagpirma sa Deed of Donation, nga nagpasabot sa opisyal nga pag-turnover sa pasilidad gikan sa Department of Trade and Industry ngadto sa LGU.
Lakip sa mga ekipo nga gihatag sa proyekto ang duha ka straight sewing machines, usa ka edging machine, usa ka zigzag machine, usa ka sew master machine ug usa ka cutting table nga gamiton sa mga mananahi.
Sumala sa DTI Zamboanga del Sur, tumong sa maong proyekto nga mapalambo ang panginabuhian sa komunidad, ilabi na sa mga mananahi aron mapaayo ang produktibidad ug kalidad sa ilang mga ginama nga produkto.
Photo Courtesy:DTI Zamboanga del Sur
