Gi-report sa mga awtoridad sa Cuba nga nahugno ang ilang national electric grid niadtong Lunes (oras sa Cuba) nga niresulta sa halapad nga blackout nga nakaapekto 10 milyon nga residente sa tibuok isla.
Ang insidente nahitabo taliwala sa grabeng oil blockade nga gipatuman sa Estados Unidos nga nakapasamot sa generation system sa nasud. Kasamtangan pang gi-imbestigahan kung unsa ang hinungdan sa pagkahugno sa grid, human sa sunod-sunod nga dagkong outage nga nilungtad og pipila ka adlaw.
Sumala sa kagamhanan, dili una nila ipasangil ang pagkaguba sa usa ka dako nga planta sa kuryente, kondili posible nga problema sa transmisyon ang rason sa hitabo. Nasayran nga ang oil blockade sa Amerika miresulta sa pagkapugong sa mga fuel imports sulod sa pipila ka bulan sa nasud human napriso si Venezuelan President Nicolás Maduro, kinsa usa sa mga nagsuporta sa Cuba pinaagi sa pagpadala og suplay sa lana.
Sa pagkakaron, nagsalig ang Cuba sa Mexico ug Jamaica nga naghatod og limitado nga suplay sa lana karong tuiga. Samtang anam-anam na nga gisugdan ang pagbalik sa pipila ka gagmay nga bahin sa koneksyon sa kuryente, nagpabilin gihapon ang dako nga hagit sa pagpabalik sa tibuok grid ug pagmintinar sa suplay.
Photo courtesy:VOX
