Gisupak sa nagkalain-laing grupo sa mga trabahante ug negosyante ang gipatuman nga 4-day work week sa mga ahensya sa gobyerno nga nagsugod kagahapong adlawa, Marso 9. Matod ni Santiago Dasmariñas Jr., presidente sa Confederation for Unity, Recognition and Advancement of Government Employees, bisan og adunay pipila nga pabor niini, sa kinatibuk-an wala kini nagtubag sa tinuod nga panginahanglan sa mga empleyado.
Gihingusgan ni Dasmariñas nga ang maong polisiya napakyas sa pagkonsiderar sa minilyon nga job order ug contractual workers sa gobyerno nga ubos sa “no work, no pay” nga sistema. Base sa datos sa Civil Service Commission (CSC), adunay kapin 900,000 ka mga job workers sa tibuok nasod ang posibleng mas maglisod niining panahona sa krisis tungod sa maong kausaban.
Dugang pa ni Jerome Adonis, ang chair sa Kilusang Mayo Uno (KMU), mahimong moresulta kini sa grabeng kakapoy sa mga empleyado tungod kay mapugos sila sa pagtrabaho og hangtod sa 12 ka oras matag adlaw aron makompleto ang oras sa upat lang ka adlaw. Imbes nga mubo nga semana sa trabaho, nanawagan ang mga labor groups og tinuod nga economic relief sama sa temporaryong pagtangtang sa excise tax sa petrolyo ug value-added tax (VAT) sa mga batakang palitonon.
Photo Courtesy: Business Mirror
