Andam na ang probinsya sa Bukidnon sa pag-host sa labing dako nga kalihokan sa paugnat sa kusog sa rehiyon, ang Northern Mindanao Regional Athletic Association (NMRAA) Meet 2026. Gibanabana nga moabot sa 9,580 ka mga atleta, coaches, ug officials gikan sa 11 ka delegasyon ang magtapok sa Bukidnon Sports and Cultural Complex sa Malaybalay City.
Sa eksklusibong pakighinabi sa Juander Radyo Malaybalay, gipadayag ni DepEd Bukidnon Information Officer Said Macabago nga gitakda na ang opening ceremony sa Marso 19, 2026 human giadjust ang orihinal nga petsa nga Marso 18 aron masiguro ang presensya sa keynote speaker nga si Senator Juan Miguel Zubiri.
Dugang pa ni Macabago nga bisan pa man og adunay 14 ka school divisions sa tibuok Region 10, mahimo na lamang kini nga 11 ka delegasyon alang sa kompetisyon, tungod naghiusa isip usa ka delegasyon ang “One Asenso Misamis Occidental.”
Sa karon, pipila na sa mga atleta, ang sayo nangabot sa Bukidnon aron maka-adjust sa bugnaw nga panahon sa probinsya. Gipaniguro usab sa opisyal nga kompleto ang mga pasilidad, lakip na ang billeting quarters ug seguridad, aron mahimong mapasigarbuhon ang unang higayon nga pag-host sa Bukidnon niining maong dakong kalihokan nga molungtad hangtod sa Marso 24, 2026
Sa katapusan, gipadayag ni Macabago nga ang pinakaimportante nga tumong sa kalihokan mao ang pag-develop sa mga kabatan-onan pinaagi sa sportsmanship, respeto, determinasyon, ug disiplina.
Photo Courtesy: Progress Watch
