Nagpahimangno ang Department of Energy (DOE) nga posibleng mas dako pa ang isaka sa presyo sa lana sa nasud karong semanaha tungod sa nagpadayong kagubot sa Middle East.
Gibutyag ni Atty. Rino Abad, direktor sa DOE Oil Industry Management Bureau niadtong Sabado, ang “minimum” nga banabana sa usbaw:
- Diesel: Php19.00 matag litro
- Gasoline: Php9.00 matag litro
- Kerosene: Php31.00 matag litro
Kini nga mga kantidad mas taas itandi sa unang gibanabana sa mga tinubdan sa industriya niadtong Biyernes.
Matod ni Abad, “minimum” pa lang kini tungod kay wala pa maapil ang mga bayranan sa insurance ug uban pang premiums sa pag-angkat sa lana.
Tungod sa bati nga sitwasyon sa kalibutan, ginalantaw nga mosaka gyud ang presyo sa lana sa merkado.
Ang kabug-at sa maong usbaw, gihangyo sa administrasyon ni Presidente Ferdinand “Bongbong” Marcos Jr. ang mga kompanya sa lana nga himuon lang kining “staggered” o hinay-hinay ang pagpasaka aron dili kaayo mabug-atan ang mga konsumante.
Matod ni Abad, naghulat pa ang DOE sa desisyon sa matag kompanya kon unsaon nila pagpatuman ang usbaw.
Kon dako kaayo ang saka, basin himuon kini og matag adlaw (daily staggered increase). Kon madala-dala ra, basin himuon kini og kaduha sa usa ka semana.
Sa pagkakaron, padayon ang pagcompute sa mga kompanya sa lana sa ilang pinal nga computations sa dili pa ang opisyal nga pagpatuman sa bag-ong presyo karong Martes.
Photo Courtesy: Philippine News Agency
