Upat ka mananagat ang nadakpan sa usa ka anti-illegal fishing operation nga gihimo sa kapulisan uban sa mga lokal nga ahensya niadtong alas 1:00 sa kaadlawon, Marso 6, 2026, sa municipal seawaters sa Barangay General Island, Cantilan.
Ang operasyon gipahigayon sa mga personahe sa Cantilan Municipal Police Station (MPS) nga gipangunahan ni PMSg Anthony T. Angcla ubos sa pagdumala ni PMAJ Joeverie S. Arreza, Acting Chief of Police. Kauban sa operasyon ang Municipal Fisheries Office nga gipangulohan ni Rico Mendaña, Municipal Fish Warden sa Cantilan, ug mga personahe sa Coastal Resource Management (CRM).
Sa maong operasyon, nadakpan ang upat ka suspek nga giilang si alyas “Sam,” 44 anyos; alyas “Nante,” 31 anyos; alyas “Ron2x,” 54 anyos; ug alyas “Nel,” 37 anyos. Ang mga suspek pulos mga mananagat ug residente sa Purok 4 ug 5 sa Barangay Caglayag, Carrascal, Surigao del Sur.
Sumala sa kapulisan, nasakpan ang mga suspek samtang nagbuhat og ilegal nga pagpangisda nga gitawag og “boso” gamit ang compressor, usa ka pamaagi nga gidili tungod sa kadaot niini sa kinabuhi sa kadagatan ug sa coral reefs.
Nakumpiska sa mga awtoridad ang lain-laing kagamitan sa ilegal nga pagpangisda lakip ang usa ka fishing boat nga adunay gibanabana nga kantidad nga ₱60,000, usa ka compressor fishing gear nga nagkantidad og ₱40,000, usa ka compressor plastic hose nga nagkantidad og ₱5,000, ug usa ka makina sa bangka nga nagkantidad og ₱30,000. Narekober usab ang lain-laing klase sa preskong isda nga adunay gibanabana nga kantidad nga ₱800.
Matod ni PMAJ Joeverie S. Arreza, padayon ang kapulisan sa pakigtambayayong sa lokal nga panggamhanan ug mga ahensya aron mapugngan ang ilegal nga pagpangisda ug mapanalipdan ang kadagatan sa lungsod.
Giawhag usab niya ang mga mangingisda ug ang komunidad nga magtinabangay sa pagpreserbar sa marine resources aron masiguro ang malungtarong panginabuhi alang sa umaabot nga mga henerasyon.
Photo courtesy: Cantila MPS
