Gisiguro sa Department of Migrant Workers (DMW) nga hatagan og full-assistance ang nabiling pamilya sa Overseas Filipino Worker (OFW) nga si Mary Anne de Vera kinsa nakalas sa Tel Aviv human kini naigo sa shrapnel.
Matod ni DMW Secretary Hans Leo Cacdac katambayayon ang Overseas Workers Welfare Administration (OWWA) nga ila na nga nahinabi ang kabanay ni De Vera lakip ang kapikas niini nga anaa sa Israel, igsuon nga anaa sa Qatar, ug ang iyang pamilya sa Pangasinan.
Dugang ni Cacdac nga ang patayng lawas sa OFW andam na nga i-repatriate sa oras nga modeklara nga luwas na ang air travel alang sa repatriation.
Samtang, nakatakda sa sab nga mobalik sa nasud ang 299 nga Pilipino gikan sa Dubai, United Arab Emirates (UAE). Mao kini ang labing una nga batch sa repatriation sukad nga nagsugod ang pagbuto sa tensyon sa Middle East.
Nipahimangno sab ang kalihim sa mga OFW sa Middle East nga mag-amping kanunay nunot sa nagkagrabe nga tensiyon sa rehiyon.
Photo Courtesy: PIA
