Misaka ngadto sa 2.4% ang inflation rate sa nasud niadtong Pebrero 2026 sumala sa taho sa Philippine Statistics Authority o PSA. Kini ang giila nga labing paspas nga pagsaka sa presyo sa mga paliton sulod sa 13 ka bulan, diin mas taas kini kon itandi sa 2.0% niadtong Enero 2026 ug 2.1% niadtong Pebrero 2025.
Sumala sa PSA, ang nag-unang hinungdan sa inflation ang paspas nga pagsaka sa presyo sa pagkaon ug mga non-alcoholic beverages nga duna’y 29.5% nga bahin sa kinatibuk-ang inflation.
Misaka usab ang presyo sa housing and utilities sa 3.5%, restaurants and accommodation services sa 4.4%, recreation, sport, and culture sa 4.3%, ug health sa 3.2%.
Ang core inflation, diin wala nalakip ang pinili nga pagkaon ug enerhiya, anaa sa 2.9% nga mas taas sa 2.8% niadtong Enero. Sa bahin sa food inflation, nisaka kini sa 1.6% gikan sa 0.7% sa niaging bulan apan mas ubos kini sa 2.6% nga natala niadtong Pebrero 2025. Namatikdan ang pagsaka sa presyo sa bugas sa 3.4%, lakip na ang mais, arina, isda, seafood, dairy products, prutas, nuts, ug mga utanon.
Photo courtesy: Istock
