Personal nga nibisita sa Office of the Taguig City Prosecutor si Vice President Sara Duterte alang sa pagsang-at og sinumpaan nga reklamong perjury batok kang Ramil Madriaga.
Si Madriaga usa ka self-confessed former aide ug niangkon nga matud pa bagman ni Vice President Sara Duterte.
Matod ni Atty. Paolo Panelo, legal counsel sa bise-presidente nga naggikan ang gipasakang reklamo sa malisyoso ug sayop nga pamahayag ni Madriaga gikan sa iyang affidavit niadtong Nobyembre 29, 2025.
Gipamahayag niadto ni Madriaga nga nagsilbi kining intelligence and security officer nga nitabang sa “Inday Sara Duterte is my President” (ISIP) group niadtong 2020 nga giingong nagdeliver og salapi sa mga personalidad ubos sa direktiba ni kanhi President Rodrigo Duterte ug Vice President Sara Duterte.
Pagpasabot ni Madriaga, nakakuha kini sila og certification gikan sa Presidential Security Command, Armed Forces of the Philippines Security and Protection Group (AFP-SPG), Department of Education (DepEd), Davao City local government unit (LGU) nga nagpamatuod nga wala nilang nahimong empleyado si Madriaga.
Samtang aduna sab pagpasabot si Atty. Panelo Jr. subay sa timing sa pagpasaka og reklamo ngadto kang Madriaga gumikan niadtong nilabay nga tuig pa ang affidavit niini apan karon lang nihimo og lakang ang bise presidente tungod giapil si Madriaga sa mga testigo sa impeachment complaint batok kang VP Sara.
