Pormal nang nakalingkod ang walo ka acting councilors sa lungsod sa Minglanilla human sa gihimong ceremonial oathtaking ngadto sa Cebu Provincial Capitol kauban ni Cebu Provincial Governor Pamela Baricuatro.
Ang maong mga acting councilors kabahin sa Nacionalista Party ug sa lokal nga pundok nga Abante Minglanilla nga gipangulohan ni Mayor Rajiv Enad ug Vice Mayor Elanito “Lani” Peña. Sila maoy gipuli sa mga pwesto sa konseho nga nabakante human sa gipagawas nga suspension order batok sa pipila ka opisyal.
Gipirmahan ni Department of the Interior and Local Government Secretary Juanito Victor “Jonvic” Remulla Jr. ang ilang appointment papers niaging semana, ug misunod dayon ang ilang panumpa sa katungdanan atubangan ni Judge Charisse Faith T. Pepito-Sojor.
Gikuyogan usab ni Acting Vice Mayor Joe Romulus “Mulot” Laput ang mga bag-ong acting councilors sa courtesy call ug ceremonial oathtaking sa Kapitolyo isip kabahin sa ilang opisyal nga pagsugod sa serbisyo.
Sumala sa lokal nga panggamhanan, gilauman nga pinaagi sa interim council nga naporma, mas mapadali ang pagpadayon sa mga programa ug proyekto alang sa kalamboan sa lungsod sa Minglanilla.
