Nanawagan si Vice President Sara Duterte sa publiko nga likayan ang pag-organisar og mga motorcade ug caravan sa sakyanan isip porma sa protesta, taliwala sa padayon nga pagsaka sa presyo sa gasolina nga may kalabutan sa panagbangi sa Middle East.
Sa iyang pahayag, giingon ni Duterte nga ang maong mga kalihokan mahimong hinungdan sa dugang nga gasto sa gasolina, samtang nagpalala usab sa polusyon sa hangin ug nagmugna og grabe nga trapiko nga makaapekto sa kadaghanan.
Matod niya, sa panahon nga nag-atubang ang nasud sa posibleng dugang nga pagsaka sa presyo sa produktong petrolyo, ang responsableng paggamit sa sugnod ug pagpanalipod sa kalikopan kinahanglan nga unahon.
Giawhag usab ni Duterte ang mga lokal nga pangagamhanan nga magpatuman og mga lakang aron idili ang mga motorcade ug caravan sa sakyanan, bisan pa man kung kini nagpakita og suporta kang kanhi Presidente Rodrigo Duterte.
Gipasiugda niya nga mas angay hatagan og bili ang kaayohan sa kadaghanan ug ang epekto sa maong mga panagtapok sa komunidad ug sa kalikopan, imbes nga magpadayon sa mga kalihokang makadugang sa konsumo sa gasolina.
Photo Courtesy: OVP
