Usa ka talagsaong kaso ang gibutyag sa usa ka nurse sa Taiwan human usa ka estudyante sa unibersidad ang nakaangkon og grabe nga problema sa utok tungod sa walay hunong nga pagduwa og video games sulod sa upat ka adlaw ug tulo ka gabii!
Sumala sa ICU nurse nga si Lin Ting, giambit niya sa social media ang kahimtang sa usa ka batan-ong gamer nga halos wala na mobiya sa iyang computer samtang nagbakasyon.
Matod pa, bisan pa sa sige og badlong sa iyang inahan nga magpahulay ug matulog, wala gyud motuo ang batan-on ug nagpadayon sa pagduwa — pahulay lang kuno kung mag-CR o mokaon og snacks.
Apan human sa upat ka adlaw nga halos walay tulog, kalit lang siyang misinggit sa kasakit samtang padulong sa banyo ug natumba sa salog.
Dali siyang gidala sa ospital diin nadiskubre sa mga doktor nga nabuslot ang usa ka ugat sa iyang utok, nga maoy hinungdan sa grabe nga pagdugo o cerebral hemorrhage.
Bisan pa sa emerhensiyang operasyon, napugos ang pamilya nga manamilit sa batan-on human sa pipila ka bulan nga pagsalig sa life support.
Busa pahimangno sa mga doktor: ang sobra nga kakapoy, kakulang sa tulog, ug stress — sama sa sobra nga pagduwa og video games — mahimong makapahuyang sa mga ugat sa utok.
Mao nga mga kajuander, ok ra magduwa og online games — ayaw lang gyud himoang full-time job ang pag-pindot sa keyboard.
Kay basin imbis “Game Over” sa screen… ikaw nuon ang ma-game over!
Photo courtesy: Gelato
