Gipasidan-an sa bag-ong regional director sa Land Transportation Franchising and Regulatory Board o LTFRB-7 Abosamen Matuan, ang mga operator ug driver sa pampublikong sakyanan nga likayan ang sobra nga paningil sa pamasahe.
Matod ni Matuan nga kinahanglan sundon sa mga operator ug driver ang opisyal nga pamasahe bisan pa sa mga diskusyon sa posibleng fare hike tungod sa pagsaka sa presyo sa lana nga may kalabotan sa tensiyon sa Middle East.
Gibutyag usab niya nga ang mga madakpan nga maningil og sobra mahimong makapenalti, lakip ang multa o suspensyon sa ilang prangkisa depende sa kabug-at sa paglapas.
Sa pagkakaron, nagpaabot pa ang LTFRB-7 og giya gikan sa central office sa posibleng provisional fare adjustment tungod sa nagkataas nga presyo sa krudo sa kalibutan.
