Nangayo na og higayon sa world title fight ang Boholano boxer nga si Regie Suganob, nailhan isip “Filipino Phenom,” human sa iyang impresibong kadaugan sa Tagbilaran City niadtong Pebrero 28.
Gipahunong ni Suganob sa eighth round pinaagi sa technical knockout ang South African boxer nga si Siphamandla Baleni, nga nagpakita sa iyang kahanas nga atubangon ang bisan kinsang world champion sa light flyweight division.
Sa iyang post-fight interview, diretsahan niyang gihagit ang reigning WBO Light Flyweight World Champion ug WBA Light Flyweight World Champion nga si Rene Santiago, nga matod pa niya dugay na kunong naglikay sa ilang away.
Nahimong WBO Global light flyweight champion ug No.1 contender sukad 2023 si Suganob nga nagpahayag nga andam siyang moatubang kang Santiago o bisan kinsa pang world champion sa division. Samtang ang PMI Bohol Boxing Promotions ug ang Bohol Provincial Government nagtrabaho aron madala sa Bohol ang posibleng historic world title fight.
