Gikasuhan na og murder ang usa ka lalaki nga unang nailhan nga mitunol og pitaka, kalabot sa pagpatay sa kanhi kapitan sa Barangay Tres de Mayo nga si Oscar “Dodong” Bucol Jr. sa Digos City.
Sumala kang Police Regional Office 11 (PRO-11) Regional Director Leon Victor Rosete, pormal nang gisang-at ang kaso batok sa maong suspek uban sa tulo pa ka wala mailhing kauban o John Does nga giingong nalambigit sa krimen.
Gibutyag ni Rosete nga ang kaso karon anaa na sa piskalya aron padayon nga imbestigahan ug madeterminar ang responsibilidad sa matag suspek sa maong insidente.
Matod pa sa kapulisan, mahinumduman nga si Bucol gipusil ug namatay sa gabii sa Nobyembre 25, 2025, samtang nag-livestream sa social media didto sa garahe sa iyang balay sa Barangay Tres de Mayo, Digos City.
Padayon pa ang imbestigasyon sa kapulisan aron masuta ang motibo sa krimen ug mailhan ang ubang posibleng nalambigit sa pagpatay sa barangay kapitan.
