Mi-apply ug principal sa iyang gi-skwelahan ang usa ka grade 5 nga studyante alang sa bakanteng posisyon, human niya mabalitaan ang pag-resign sa prinsipal sa Chief Joseph Elementary School sa Great Falls, Montana.
Sa dihang nahibal-an sa 11-anyos nga si Ruth Rossmiller nga ang ilang prinsipal, si Brian Miller, mohawa na, dali kini nga gihangyo ang iyang inahan nga tabangan siya sa pagsulat og 10 ka pahina nga application letter ug resume.
Natingala ang mga administrador sa eskwelahan nga gipadala ni Ruth ang iyang aplikasyon, apan gihatagan nila siya og oportunidad ug gipadayon ang job interview.
Sa usa ka interbyu uban ni Mrs. Keeler, usa sa mga magtutudlo nga nagtan-aw sa job interview ni Ruth, miingon siya nga nahingangha kaayo siya sa bata tungod kay wala siya gikulbaan sa pagtubag sa mga pangutana sa mga superintendent sa eskwelahan.
Atol sa job interview, usa sa mga superintendent sa eskwelahan nangutana kang Ruth kon unsaon niya pagdumala ang skwelahan. Mitubag si Ruth nga adunay mga dula matag buntag aron madasig ang mga estudyante nga moanha ug dili ma-bully. Himoon usab niya nga permanente nga menu sa canteen ang mga tacos tungod kay kini ang paborito nga pagkaon sa mga studyante.
Nakadayeg ang tibuok magtutudlo sa eskwelahan kang Ruth tungod sa iyang interes sa career sa edukasyon. Bisan wala ma-dawat si Ruth isip full-time nga prinsipal, gitugotan siya sa mga administrador sa eskwelahan nga mahimong “prinsipal sa adlaw nga siya mi-apply.
Photo Courtesy: 3KRTV
