Nagsumite si Senador Imee Marcos sa P.S. Resolution No. 333 nga naghangyo og imbestigasyon, mahitungod sa oil reserves sa nasod ug ang pagpangandam sa gobyerno batok sa posibleng “energy shock.” Giduso ang resolusyon niadtong Marso 3 taliwala sa nagkagrabe nga tensyon sa Middle East nga gilauman nga makaapekto sa presyo sa lana sa tibuok kalibutan.
Sa iyang resolusyon, gihisgutan ni Senador Marcos ang rekomendasyon sa International Energy Agency (IEA) nga kinahanglan ang matag nasod adunay oil stock nga katumbas sa 90 ka adlaw nga net oil imports. Apan, sumala ni President Ferdinand Marcos Jr., anaa lamang sa 50 hangtod 60 ka adlaw ang kasamtangang reserba sa nasod alang sa gasolina, fuel oil, ug kerosene. Matod pa sa senadora, makapabalaka kini tungod kay dili igo ang mga reserba diin ang LPG dili gani moabot og usa ka bulan ug ang gasolina wala pay duha ka bulan, busa kinahanglan ang klaro ug konkretong emergency plan aron maprotektahan ang energy security.
Dugang pa ni Marcos, dako og epekto ang sige’g usab-usab nga presyo sa lana sa ekonomiya sa Pilipinas isip usa ka oil-importing country tungod kay direktang maigo ang transportasyon, kuryente, agrikultura, ug presyo sa mga palitunon. Gihisgutan usab niya nga nagsumite na siya kaniadto og Senate Bill No. 187, nga gi-refile isip SBN 120 niadtong 2025, nga maghatag og gahum sa Presidente nga tangtangon ang VAT sa lana kon adunay state of emergency.
Imbes nga katap nga subsidy o price controls, giinsistir ni Marcos nga kinahanglan ang targeted assistance sa mga sektor nga labing nanginahanglan. Iyang gisugyot usab ang pagsulod sa mga long-term fixed-price supply contracts aron malikayan ang kalit nga pagsaka sa presyo. Isip kasamtangang chair sa Association of Southeast Asian Nations (ASEAN), gidasig niya ang Pilipinas nga makigtambayayong sa mga silingang nasod sa oil stockpiling ug procurement aron mapalig-on ang energy security sa rehiyon. Gipasiugdahan niya nga dili angay mag-antos ang mga oil-poor nga nasod sama kanato kon adunay konkretong plano ug klarong mga lakang alang sa seguridad sa enerhiya.
Photo courtesy: Senate of the Philippines
