Giimbestigahan karon sa Philippine National Police (PNP) sa usa ka nikatag nga post sa social media nga nagaingon nga adunay nationwide class ug work suspension gikan Marso 4 hangtod 6, 2026 tungod matod pa sa security threat.
Sumala sa PNP, wala’y tinuod nga basehan ang maong pahibalo ug dili kini gikan sa bisan unsang opisyal nga ahensya sa gobyerno.
Matod pa kang PNP Chief Jose Melencio Nartatez Jr., wala’y nakit-an nga hulga sa seguridad nga magkinahanglan og nationwide suspension sa klase ug trabaho.
Gisugo na ang PNP Anti-Cybercrime Group aron pangitaon kung kinsa ang naghimo ug nagpakalat sa maong maling impormasyon. Giingon sa PNP nga posible makasuhan ang mga responsable tungod sa pagpakalat og fake news nga nakahatag og kahadlok sa publiko.
Gipahimangnoan usab sa PNP ang publiko nga dili dayon motuo o mo-share sa mga balita nga wala pa makompirma. Mas maayo nga mosalig lamang sa opisyal nga pahibalo gikan sa gobyerno.
Naghangyo usa karun ang kapulisan nga magpabiling kalmado ang tanan ug magtinabangay aron mapugngan ang pagkatag sa sayop nga impormasyon.
Photo Courtesy:kaperksy
