Posibleng mosaka ang presyo sa lana og hangtod ₱10 kada litro sa mosunod nga mga semana samtang ang tensyon tali sa Estados Unidos ug Iran nagpadayon sa pag-apekto sa merkado sa lana sa tibuok kalibutan, sumala sa Department of Energy – Oil Industry Management Bureau (DOE-OIMB) adlawng Martes.
Matod ni DOE-OIMB Director Rino Abad, kung moabot og USD20 [ang saka kada bariles], posible kitang makasinati og ₱7 hangtod ₱10 kada litro nga usbaw.
Dugang pa niya, sa pagkakaron, ang ilang banabana sa epekto sa unang adlaw pa lang sa trading adjustment sa MOPS (Means of Platts Singapore) price anaa na sa ₱5 hangtod ₱10 kada litro.
Gikataho sa kasaligang tinubdan nga ang presyo sa Brent crude nisaka og hangtod 13% ngadto sa $82.37 kada bariles—ang kinatas-an sukad niadtong Enero 2025—sa wala pa kini mibalik sa $77.74.
Ang pagsaka sa presyo sa lana ug gas niadtong Lunes nasinati human sa mga pag-atake sa Israel ug U.S. batok sa Iran ug ang pagbalos sa Tehran. Kini nga mga tensyon miresulta sa pagsira sa mga pasilidad sa lana ug gas sa rehiyon ug nakabalda sa pagbiyahe sa mga barko sa importante nga Strait of Hormuz.
Photo courtesy: Logisticsbid
