Padayong gisusi karon ang mga report nga namatay sa usa ka airstrike ang bag-o pa lang gideklara nga interim Supreme Leader sa Iran nga si Ayatollah Alireza Arafi, pipila lang ka minuto human sa iyang pormal nga paglingkod sa pwesto.
Una niini, pormal nang gitudlo si Ayatollah Arafi isip miyembro sa temporaryo nga Leadership Council sa Iran nunot sa pagkamatay ni Supreme Leader Ayatollah Ali Khamenei sa sunod-sunod nga pag-atake sa US ug Israel.
Sumala sa report sa state media sa wala pa ang giingong bag-ong pag-atake, makauban unta ni Arafi sila si Presidente Masoud Pezeshkian ug Chief Justice Gholamhossein Mohseni Ejei aron temporary nga mobuhat sa mga katungdanan sa Supreme Leader samtang wala pa makapili og sumusunod ang Assembly of Experts.
Sa wala pa ang mga balita bahin sa giingong pagkamatay ni Arafi, hugot nga gikondena ni Presidente Pezeshkian ang pagpatay sa ilang mitaliwan nga Supreme Leader ug gitawag kini nga usa ka “declaration of war” batok sa mga Muslim.
Gipaabot pa sa pagkakaron ang opisyal nga kumpirmasyon gikan sa kagamhanan sa Iran ug state media bahin sa tinuod nga gidangatan ni Ayatollah Alireza Arafi human sa gipahigayong airstrike.
Photo courtesy: The Indian Express
