Gipirmahan sa 22 ka senador ang usa ka sugyot resolusyon nga nag-awhag sa kagamhanan nga dinalian nga mopatuman og mga lakang aron masiguro ang proteksyon sa mga Overseas Filipino Workers (OFWs) taliwala sa nagkagrabe nga tensyon sa Middle East.
Dungan niini, gi-awhag usab ang gobyerno nga mohimo og mga interbensyon aron mamenosan ang grabe nga epekto niini sa ekonomiya sa Pilipinas. Ubos sa Proposed Senate Resolution No. 325, gipasabot sa mga senador nga ang nagkataas nga tensyon ug ang pagkabalda sa mga biyahe sa eroplano sa Middle East direktang makaapekto sa kaluwasan ug kaayohan sa mga OFW sa rehiyon.
Gihatagan usab og punto nga ang tensyon naghulga sa suplay sa lana sa tibuok kalibutan, nga mahimong hinungdan sa pagsaka-kanaog sa presyo sa gasolina sa nasud, ug makaapekto sa mga exporter, supply chains, pletehan, inflation sa pagkaon, ug sa kinatibuk-ang kalihokan sa ekonomiya.
Tungod niini, gi-awhag ang Department of Foreign Affairs (DFA) nga pakusgan ang mga travel advisory ug crisis communication ngadto sa mga OFW; samtang ang Department of Migrant Workers (DMW) ug uban pang ahensya gihangyo nga mopatuman og monitoring ug mga welfare measures.
Nanawagan usab ang resolusyon alang sa konsiderasyon sa temporaryong suspensyon o pagkunhod sa fuel excise tax ubos sa klaro nga mga giya, ug giduso ang targeted assistance alang sa mga exporter nga maapektuhan sa pagkabalda sa trade ug logistics.
Niluwat sa ilang pirma ang tanang senador gawas lang nila ni Senate Minority Leader Alan Peter Cayetano ug Senador Ronald “Bato” dela Rosa.
Sumala ni Senador Erwin Tulfo, chairman sa Senate Foreign Relations Committee, ipahigayon ang usa ka pagdungog (hearing) karong Biyernes, Marso 6, aron hisgutan ang isyu. I-imbitar ang mga ahensya sama sa DFA, DMW, Department of Energy (DOE), Department of Transportation (DOTr), ug Department of Trade and Industry (DTI).
Photo courtesy: Senate of the Philippines
