Mobalik sa “drawing board” ang Gilas Pilipinas human sa magsunod nga kapildihan batok sa New Zealand Tall Blacks ug Australia Boomers sa ilang mga home game sa kasamtangang window sa FIBA Basketball World Cup Qualifiers.
Dili usa modula ang national team hangtod sa Hulyo, diin sila na usab ang mobisita sa Australia ug New Zealand aron tapuson ang unang round sa qualifiers alang sa FIBA World Cup nga ipahigayon sa Doha.
Bisan og sigurado na ang Gilas sa pagsaka sa sunod nga hugna sa kwalipikasyon, importante gihapon nga makakuha og daog ang koponan aron adunay tsansa nga makakuha og tiket paingon sa World Cup.
Matod ni head coach Tim Cone, kinahanglan nga pangandaman sa koponan ang ilang mga dula sa second round, ilabi na nga makaatbang sa team ang mga nasod gikan sa Middle East sama sa Jordan, Iran, Syria, ug Iraq.
Sa pagkakaron, tabla ang Gilas ug New Zealand nga adunay 2-2 nga baraha, samtang nag-una ang Australia sa Group A nga adunay limpyo nga 4-0 record. Hapit na usab mawad-an og tsansa ang Guam human kini nahagsa sa 0-4.
Nagpabilin usab nga hisgutanan ang mamahimong komposisyon sa koponan karong Hulyo, lakip na ang availability ni Kai Sotto ug ang posibleng pagsulod ni Justine Baltazar sa final lineup.
Photo courtesy: Rappler
