Gipahayag ni City Councilor Marlo Tabac nga ang iyang komite sa barangay affairs kasamtangang nagrepaso sa mga haom nga balaod aron mahibaluan ang mga silot nga mahimong ipahamtang sa mga establisyemento nga nagbaligya ug nagtugot sa pag-inom og bino sa ilang dapit lapas sa gitakdang oras.
Kini nga reaksyon migula taliwala sa deliberasyon sa sugyot ni Councilor Roger Abaday nga nagtumong sa pag-regulate sa pagbaligya ug paghimo og mga improvised nga tambutso (mufflers), nga nalambigit sa mga insidente sa drag racing ug kasamok sa kagabhion sa pipila ka mga barangay.
Matod ni Tabac, nigula sa mga diskusyon sa lebel sa komite nga bisan og ang mga bar kasagarang nagsunod sa “12-midnight last order,” ang ubang mga kustomer mobalhin lang sa duol nga mga convenience store aron ipadayon ang ilang pag-inom.
Dugang pa niya, adunay mga tindahan nga dili lang mamaligya og ilimnong makahubog, kondili motugot usab nga moinom ang mga kustomer sa sulod o sa gawas mismo sa ilang establisyemento.
Gipunting sa mga konsehal nga ang sobra nga pag-inom giila nga usa sa mga rason sa ilegal nga drag racing, ilabi na sa mga dapit sama sa Kauswagan, Gusa, ug sa daplin sa coastal road paingon sa Lapasan.
Photo courtesy: Dreamstime.com
