Nipahigayon ang City of Talisay–Traffic Operation Development Authority (CT-TODA) og road safety seminar alang sa mga E-bike driver isip kabahin sa proseso sa rehistrasyon sa mga E-bike nga mobiyahe sulod sa Dakbayan sa Talisay.
Kapin sa 4,000 ka mga aplikante ang niapil sa programa, apan 2,590 lamang ang nakapasar ug nakatambong sa seminar, diin 2,422 niini ang for-hire nga E-bike samtang 168 ang mga pribadong unit.
Gipatuman ang seminar sa nagkalain-laing barangay aron malikayan ang pagdasok sa mga drayber ug tag-iya sa E-bike.
Lakip sa mga lugar diin gipaubos ang maong programa, ang Barangay Pooc, Biasong, Poblacion, Dumlog, Cansojong, Tanke, San Roque, San Isidro, Bulacao, Lagtang, Tabunok, Mohon ug Lawaan II.
Sumala sa CT-TODA, kasamtangang gisusi ang listahan sa mga drayber nga wala makatambong sa maong seminar, tungod kay dili sila hatagan og rehistrasyon sa ilang E-bike subay sa ordinansa nga gipatuman sa dakbayan.
