Giila sa Guinness World Records ang usa ka lalaki sa USA human niya nakuha ang titulo nga ‘Most Concerts Attended in 1 Year’. Naila ang maong lalaki mao Si Timothy “Tim” Schaefer gikan sa Charlotte, North Carolina, USA mitambong og total nga 289 ka konsyerto sulod lang sa 365 ka adlaw.
Matod nga aron makab-ot ang rekord, si Schaefer mibisita sa 34 ka lain-laing music venues sa pito ka estado sa USA. Gibanabana nga migasto siya og sobra sa $10,000 (Php560,000) sa mga tiket aron makakita og 708 ka lain-laing artista ug 751 ka banda gikan sa lain-laing genre sama sa metal, pop, alternative, ug jazz.
Kini nga numero wala maglakip sa mga music festival ug gagmay nga mga gig, tungod sa estrikto nga mga lagda sa Guinness nga ang matag konsyerto kinahanglan nga ipahigayon sa usa ka venue nga adunay kapasidad nga sobra sa 200 ka tawo.
Sumala ni Schaefer, kinsa usa ka single father human nabiyudo, gibati niya nga kinahanglan nga motambong sa mga live event tungod kay dili niya mahimo ang iyang kaugalingong kalipay.
Hinuon, kinahanglan niyang dawaton ang positibong energy ug vibes gikan sa mga tawo sa iyang palibot. Kabahin usab siya sa usa ka grupo nga gitawag og “ICoN Pit Crew” nga nagtumong sa paghimo sa mga mosh pit nga luwas ug paghatag og suporta sa mga kaubang fans nga nag-agi sa lisud nga mga panahon sa kinabuhi.
Bisan pa sa titulo nga anaa sa iyang mga kamot, si Schaefer walay plano nga mohunong sa pagtambong sa mga konsyerto. Andam usab siya nga malabawan ang iyang kaugalingong rekord kung adunay makapildi niini sa umaabot, tungod kay siya miingon nga ang pagpangita og live music kabahin sa iyang adlaw-adlaw nga kinabuhi.
Photo Courtesy: Guinness World Records
