Hingpit na nga andam ang Gilas Pilipinas alang sa kataposang leg sa ilang pagpangandam para sa ikaduhang window sa 2027 FIBA World Cup Asian Qualifiers nga ipahigayon sunod semana sa New Zealand ug Australia.
Nag-abot kagahapon ang mga magduduwa sa Nationals nga nagdula isip Asian imports sa nagkalain-laing liga sa Asya. Lakip nila sila si Quentin Millora-Brown sa Chiba Jets ug si AJ Edu sa Gunma Crane Thunders gikan sa Japan B. League. Miabot usab sila si Carl Tamayo sa Changwon LG Sakers ug si Kevin Quiambao sa Goyang Sono Skygunners gikan sa Korean Basketball League.
Sa sayo pa, niuli usab sa nasod ang ace guard nga si Dwight Ramos sa Levanga Hokkaido aron motambong sa ikaduhang adlaw sa training camp sa Upper Deck Sports Center sa Pasig.
Human sa inisyal nga praktis, nibalhin ang Gilas sa Inspire Sports Academy sa Calamba, Laguna aron mas mapalig-on ang ilang preparasyon sa dili pa makigsangka sa mga powerhouse sa Group A nga Australia ug New Zealand.
Mobisita ang Gilas sa New Zealand karong Pebrero 26 sa dili pa mopadayon sa Australia karong Marso 1 alang sa ilang mga away games sa homecourts sa duha ka nasud.
Sa kasamtangan, nagtabla ang Gilas ug Australia sa Group A nga adunay 2-0 nga rekord human ma-sweep ang Guam sa unang window. Ang Guam ug New Zealand nagkupot sa 0-2 nga kartada.
Bisan og mubo pa ang panahon sa ensayo, nagpabiling masaligon si Gilas head coach Tim Cone nga ang iyang kinauyokan nga lineup, nga nag-uban sukad pa sa 2024, andam sa pag-atubang sa mas lisod nga hagit sa sunod nga mga duwa.
Photo Courtesy: Gilas Pilipinas / File photo from SBP
