Nakahimo og talagsaong kampanya ang CIT-U Wildcats sa CESAFI Season 25 human makompleto ang medal tally sa unang higayon sa kasaysayan sa eskwelahan.
Nagpukan sa University of the Visayas Baby Lancers ang Baby Wildcats (Under 15) ubos sa mga coach nga sila Floyd Taboada ug Axel Rabaya, uban sa assistants nga sila Jason Velez ug Pepito Amodia Jr aron masungkit ang kampeonato. Gawas sa pagdaog og bulawan, naputol usab ang 17 ka tuig nga title drought sa CIT-U.
Sa Under 12 division, ang koponan nga gimandoan ni Dennis Lee Pacquiao nakaabot sa Finals apan nakuntento sa pilak human mapildi sa Cebu Eastern College Dragons, nga nahimong Grand Slam champions. Sa junior’s division, nakakuha og bronse ang Junior Wildcats human makapahingangha nga kadaogan batok sa Dragons sa overtime.
Sumala ni Rabaya, dako ang ilang pasalamat nga nahimong kabahin sa maong makasaysayanong higayon alang sa ilang alma mater. Bisan pa sa mga medalya, gipasiugda sa Wildcats nga ang ilang tinuod nga misyon mao ang paghulma og mga kampiyon dili lamang sa duwa, kondili usab sa kinabuhi.
