Gilusad sa GSIS ang ‘Ginhawa Go’ micro loan program alang sa mga empleyado sa gobyerno aron hatagan sila og dali nga access kung nanginahanglan sila ug dinalian nga kwarta ilabi na kung dunay emergency. Ang maong loan program para sa mga miyembro nga gusto mangutang ug PHP1,000 hangtod PHP4,000 nga kinahanglan bayaran sulod sa tulo ka bulan, o mas dako nga loan gikan PHP5,000 hangtod PHP50,000 nga kinahanglan bayaran sulod sa 24 ka bulan.
Sumala ni GSIS President Jose Veloso, ang interest rate anaa sa 6% kada tuig alang sa mga miyembro nga adunay tulo ka tuig o mas labaw pa nga kontribusyon, ug 7% alang sa mga miyembro nga mas ubos sa tulo ka tuig ang kontribusyon. Gisiguro niya nga ang proseso paspas ug sigurado pinaagi sa mga silpon, nga gitawag nga “loan on-the-go.”
Sa laing bahin, gipunting ni Finance Secretary Frederick Go nga ang microloan makatabang sa mga empleyado aron malikayan ang mga lending ug utang nga makasamot ug kapordoy. Gi-explain niya nga ang lending sa gawas, taas kaayo ang interest ug daghan ang bayrunon, apan sa GSIS, kung mo-utang ka og PHP1,000, bayaran lang nimo ang 5 pesos nga interes sa usa ka bulan, ug kung PHP10,000 imong utangon, 50 pesos lang ang interes sa usa ka bulan.
Dugang pa, gipasabot ni Veloso nga pwede gihapon mangutang pinaagi sa maong loan program ang mga miyembro bisan duna pa na silay existing nga loans sa GSIS. Gisiguro usab niya nga padayon nila nga i-improve ang serbisyo, labi na ang pagpadali sa approval sa loan applications bisan sa weekends o gawas sa office hours.
Photo Courtesy: Serbisyo Ph
