Gihingusgan sa City Health Office (CHO) – Iligan ang paghatag pahimangno ngadto sa katawhan kalabot sa risgo sa leptospirosis, human sa pagbaha nga gidala ni Bagyong Basyang nga nakaapekto sa pipila ka mga barangay ug mga dalan sa syudad.
Sumala ni Dr. Hanna Paula Jinayon Torres, ang Medical Officer, Health Cluster Head sa (CHO) Emergency Response nga ang padayon nga pagka-expose sa hugaw nga tubig baha ug lapok nagdala og dakong posibilidad nga matapnan sa leptospirosis, usa ka sakit nga kasagaran gikan sa ihi sa ilaga nga masagol sa tubig baha ug mosulod sa lawas pinaagi sa samad o panit.
Dugang pa, nga ang mga tawo nga nilusong sa baha ug walay samad girekomendar nga moinom og doxycycline isip preventive measure, duha ka kapsula sa usa ka semana, ug kinahanglan kini buhaton ubos sa tambag sa health workers sa pinakaduol nga health center.
Samtang ang mga adunay samad gidasig nga magpakonsulta gilayon sa doktor o mobisita sa matag barangay health center aron matudloan sa hustong pagtambal ug tukmang pag-inom sa doxycycline o alternatibong tambal.
Nunot niini, gipahibalo usab ni Torres, nga adunay 19 ka gidudahang kaso sa Leptospirosis sa Iligan sumala sa ilang datus, Pebrero 17, 2026.
Gipahinumdoman usab ni Torres, nga ang sayong pagpakonsulta importante aron malikayan ang komplikasyon sa sakit, ilabi na kung makasinati og sintomas sama sa hilanat, sakit sa kaunoran, kapula sa mata, ug grabeng kakapoy.
Padayon ang panawagan sa buhatan sa CHO – Iligan sa publiko nga likayan ang dili kinahanglang paglusong sa baha, magsul-ob og butas kon kinahanglan molabang, ug magpakonsulta gilayon sa matag Barangay Health Centers aron mapugngan ang posibleng pagtaas sa kaso sa leptospirosis sa syudad.
Photo Courtesy: Fikkia
