Walay undang ang Department of Social Welfare and Development Field Office XII (DSWD FO XII) sa pisikal ug personal nga beripikasyon ug pag-validate sa mga benepisyaryo sa Social Pension Program for Indigent Senior Citizens (SPISC). Kini nga lakang gibase sa mando sa DSWD Central Office ug sa resulta sa Philippine Statistics Authority (PSA) crossmatching gamit ang Community-Based Monitoring System (CBMS) data.
Tumong sa kalihokan ang pagsiguro nga husto ang identidad ug kahimtang sa mga benepisyaryo, malikayan ang iligal nga “ghost beneficiaries,” mapadayon ang updated listahan, masiguro ang sakto nga pagpagawas sa pondo, ug mapalig-on ang transparency ug accountability sa programa. Apil usab niini ang pag-integrate National ID sa mga cash-based nga programa sa ahensya.
Alang sa mga benepisyaryo nga adunay National ID, gihimo ang liveness check gamit ang BBM Serbisyo App aron mapamatud-an nga kwalipikado ang kahimtang. Samtang ang wala pa’y National ID, gi-awhag sa DSWD nga moadto sa PSA alang sa tukmang pagparehistro sa PhilSys.
Ang pisikal nga beripikasyon ginahimo pinaagi sa community assembly o home visit aron masiguro ang accessibility, labi na sa mga senior citizens nga galisud sa pagbiyahe. Ang maong programa nagpadayon aron nga mga benepisyaryo masiguro nga ang pinansyal nga tabang gikan sa gobyerno mahatag lamang sa mga lehitimo ug angay nga indigent senior citizens ning rehiyon.
Photo Courtesy: DSWD
