Nagpagula ug bag-ong department order si DPWH Secretary Vince Dizon nga magpalig-on sa performance-based nga basehan sa pag-appoint ug pag-promote sa mga regional ug district officials sa Department of Public Works and Highways o DPWH. Sumala ni Dizon, dili na ibase sa koneksyon o kaila ang promosyon kundili sa aktwal nga performance sa trabaho.
Ilalom sa bag-ong polisiya, hugot nga bantayan ang tukma, dekalidad nga pag-ayo, maintenance sa mga dalan, tulay ug uban pang proyekto lakip ang flood control structures. Apil usab sa susihon ang paspas nga pagtubag sa damage nga dala sa natural nga kalamidad, ingon man ang saktong oras ug petsa sa pagtapos sa mga proyekto. Gipahimangno ni Dizon nga matag tuig sukdon ang performance og posible nga ilisan dayon sa pwesto ang dili makapasar.
Kabahin kini sa mga reporma sa ahensya human sa mga alegasyon sa korapsyon nga nalambigit sa pipila ka flood control projects. Dugang ni Dizon, nga ang maong polisiya maghatag og oportunidad sa mga rank-and-file employees nga mapasidunggan ang ilang kakugi ug pagpaningkamot sa trabaho.
Photo Courtesy: wikipedia
