Gianunsyo ni Presidente Ferdinand Marcos Jr. nga awtomatikong maapil sa Lifeline Rate Subsidy Program ang mga benepisyaryo sa Pantawid Pamilyang Pilipino Program o 4Ps sugod ning bulan sa Pebrero aron makadawat og diskwento sa bayranan sa kuryente. Gibutyag kini sa presidente atol sa kalihokan sa Meralco niadtong Pebrero 14. Sumala niya, hangtod Nobyembre 2025, 334,400 lamang ka panimalay ang narehistro sa electricity subsidy gikan sa 3 milyon ka 4Ps beneficiaries sa tibuok nasud.
Gipatin-aw sa presidente ang hinungdan ngano gamay lang ang narehistro tungod sa strikto nga mga rekisitos sa programa. Tungod niini, mando sa bag-ong patakaran, nga ang mga 4Ps beneficiaries nga adunay konsumo nga 50 kilowatt-hour o ubos matag bulan, dili na kinahanglan mobayad sa ilang kuryente.
Ang ubang low-income families nga ubos sa poverty threshold nga gitakda sa Philippine Statistics Authority apan dili sakop sa 4Ps, mahimo usab magparehistro basta gamay ra ang ilang konsumo sa kuryente.
Photo Courtesy: Business Mirror
