Gipahibalo sa Department of Education (DepEd) nga ipatuman ang “Wellness Leave” alang sa mga magtutudlo ug kawani isip kabahin sa pagpalig-on sa ilang mental health ug kinatibuk-ang kahimsog.
Ang maong leave naghatag og dugang kahigayonan sa mga empleyado sa DepEd nga makapahulay ug makaatiman sa ilang kaugalingong kaayohan, ilabi na human sa sunod-sunod nga mga buluhaton sa eskwelahan.
Sumala sa DepEd, ang Wellness Leave mahimong gamiton alang sa mental health break, stress management, ug uban pang personal nga kahimtang nga may kalabutan sa kahimsog.
Gilauman nga pinaagi niini, mas mapalambo ang morale, produktibidad, ug kalidad sa pagtudlo sa mga magtutudlo sa pampublikong eskwelahan.
Gidasig usab sa ahensya ang mga school heads nga siguruhon ang hustong pagpatuman sa polisiya ug patas nga pag-aplikar niini.
Ang maong lakang kabahin sa mas lapad nga programa sa DepEd nga nagtinguha sa pag-atiman dili lamang sa mga estudyante kundili usab kabahin sa mga magtutudlo ug kawani sa sektor sa edukasyon.
Photo Courtesy: Philippine News Agency
