Patay ang usa ka foreign national human malumos sa Mahayag Beach Resort sa Barangay Buenavista, Tandag City niadtong nakalabay nga adlaw.
Narekober sa mga awtoridad ang lawas sa foreigner niadtong Sabado sa hapon, Pebrero 14, human sa gilusad nga joint search and rescue operation Philippine Coast Guard-Tandag, CDRRMO Tandag, Tandag City Emergency Response Team ug local divers.
Sumala kang Ensign Jobert R. Oslob, officer-in-charge sa Philippine Coast Guard Sub-Station Tandag, nakadawat sila og tawag Biyernes sa hapon gikan sa City Disaster Risk Reduction and Management Office (CDRRMO) Tandag nga nagreport sa insidente sa pagkalumos ug nangayo og dinaliang tabang. Nalangan ang pagpangita sa biktima tungod sa kusog nga current sa dagat ug limitadong underwater visibility nga nakaapekto sa operasyon sugod Biyernes hangtod Sabado sa buntag. Bandang alas-1:00 sa hapon niadtong Sabado, narekober ang lawas sa biktima nga wala nay kinabuhi.
Giila ang biktima nga si Michal Radoslow, 33-anyos, kinsa gikatakda unta nga molarga paingon sa England kagahapong adlawa Lunes. Base sa saysay sa uyab sa biktima nga si Julie Ann Adubas nga taga Brgy. Castillo, San Miguel, nakalingkawas ug nakapangayo siya ug tabang human sila makigbisog sa kusog nga balod ug sulog sa dagat samtang nagpahigayon og despedida uban sa pamilya niini apan nabilin si Radoslow.
Giturn-over na sa Tandag City Police ang patayng lawas sa biktima alang sa dugang imbestigasyon.
