Masulayan pag-usab ang reigning WBO Asia Pacific minimumweight champion nga si Joseph “The Hunter” Sumabong kon atubangon niya ang batan-ong prospect nga si Roldan Toyogon sa “Kumong Bol-Anon XXIV” karong Pebrero 28 sa Bohol Cultural Center.
Magbangga ang duha sa usa ka 10-round non-title bout sa 105-pound division. Ang maong kalihokan pangunahan ni Regie Suganob batok sa South African contender nga si Siphamandla Baleni.
Mosulod ang 24-anyos nga si Sumabong sa sangka nga may tulo ka sunod nga kadaugan human sa iyang bugtong kapildihan niadtong 2024 sa Japan batok kang Goki Kobayashi. Napilde niya si John Kevien Jimenez pinaagi sa knockout, gipilde si Joperson Trazo via unanimous decision, ug mibalos sa Japan pinaagi sa unanimous decision victory batok kang Takero Kitano aron makuha ang bakanteng WBO Asia Pacific minimumweight title.
Adunay 9-1 nga rekord si Sumabong nga may upat ka knockouts ug kasamtangang ranked No. 6 sa WBC, No. 9 sa WBO, No. 10 sa WBA, ug No. 15 sa IBF sa minimumweight division.
Samtang si Toyogon, 25, nagtinguha nga makabawi human sa duha ka sunod-sunod nga kapildihan sa gawas sa nasud. Adunay 8-2-1 nga rekord nga may upat usab ka knockouts ang boksingero gikan sa Parañaque City.
Photo Courtesy: PMI Bohol Boxing Stable
