Dakpan ang duha ka indibidwal nga mananagat pinaagi sa operatiba sa Bacuag Municipal Police Station batok sa ilegal nga pagpangisda, sa kadagatan sakop sa Barangay Poblacion, Bacuag, Pebrero 12, 2026.
Sumala ni Surigao del Norte Police Provincial Office (SDNPPO) Provincial Director PCOL Warren E. Dablo, ang mga nadakpan nakalapas sa Republic Act 8550 o Philippine Fisheries Code nga giamyendahan sa RA 10654.
Ang mga suspek usa ka 21-anyos nga estudyante nga taga-Barangay Central, Placer ug 18-anyos nga mananagat nga taga-Barangay Hagimit, Placer, Surigao del Norte.
Sa report, alas 9:45 sa gabii dihang nagpatuman og seaborne patrol ang Bacuag MPS kauban ang Bantay-Dagat ug Municipal Agriculture Office sa Purok Cabeza Jose. Naaktohan ang pump boat nga nagpahigayon og “liba-liba,” usa ka gidili nga pamaagi sa pagpangisda.
Gisulayan pa sa mga suspek nga gub-on ang ebidensya ug mikalagiw, apan napugngan sila sa mga operatiba.
Ang mga nakompiska nga pump boat gibanabana nga nagkantidad nga Php50,000, usa ka 16HP Honda engine nga nagkantidad og Php30,000, usa ka 12HP Yama engine nga nagkantidad og Php12,000, ug kapin 14 ka kilo nga nagkadaiyang klase sa isda nga may total market value nga Php1,960.
Samtang padayon ang kapulisan sa kampanya batok sa ilegal nga pagpangisda aron mapanalipdan ug mapreserbar ang kinaiyahan ug mga yamang-dagat sa probinsya.
