Patay ang usa ka 72-anyos nga babaye human kini gikulata sa suspetsado nga nagpangidaron ug 40-anyos nga nahitabo sa National Highway, Purok 7, Barangay Lacupayan, Tigbao, Zamboanga del Sur, sayo sa kadlawon, niadtong Pebrero 10, 2026.
Segon sa mga kapulisan sa Tigbao Municipal Police Station, naabtan na nilang nagbuy-od ang biktima sa nahisgutang lugar nga wala nay kinabuhi.
Sa pagresponde sa kapulisan ilang naabtan ang suspetsadong lalaki nga taga Tinago, Ozamis City nga gituohang lango sa ilimnong makahubog nga nagkadugo ang lawas ug sinina pamatuod sa paghimo niini sa kremin.
Nasayran sa imbestigasyon sa kapulisan nga gibunalan sa suspetsado sa makadaghang higayon ang ulo sa biktima gamit ang kahoy samtang naglakaw kini sa dalan nga miresulta sa hinanaling kamatayon niini.
Ang suspetsado gidala na sa kapulisan sa Tigbao Municipal Police Station alang sa pagpasaka sa tukmang kaso, samtang ang patay’ng lawas sa biktima gidala usab dayon sa punerarya sa syudad sa Pagadian alang sa saktong pagpahiluna.
Gitun-an na sa mga awtoridad ug gipalapdan pa ang imbestigasyon aron masuta ang motibo sa pagpatay, aron mapahamtangan og tukmang kaso ang suspetsado.
Photo Courtesy: PD ZSPPO, PRO9
