Prayoridad sa administrasyon ni Presidente Ferdinand Marcos Jr. nga maipasa ang balaod nga magwagtang sa travel tax sa dili pa matapos ang sesyon sa Kongreso karong umaabot Hunyo. Sumala sa Malacañang, lakip kini sa 21 ka mga balaudnon nga giuyonan ni PBBM atol sa miting sa Legislative-Executive Development Advisory Council o LEDAC.
Segon sa Palasyo nga nakita sa Presidente nga makapagaan kini sa gasto sa mga turista ug sa mga Pilipinong mo byahe sa gawas. Sa karon, gabayad og Php1,620 ang economy class passengers ug Php2,700 ang first class passengers ubos sa travel tax nga ginakolekta sa Tourism Infrastructure and Enterprise Zone Authority.
Mipahimangno si Tourism Secretary Christina Frasco nga kung wagtangon ang travel tax nga walay ikapuli nga pondo, maapektuhan ang turismo. Sumala sa datos niini, 50 percent sa koleksyon sa travel tax gigamit sa tourism infrastructure, 40 percent alang sa tourism education pinaagi sa Commission on Higher Education, ug 10 percent alang sa pagpreserbar sa mga heritage structures.
Kalabot niini, gisiguro sa Malacañang nga kung maaprubahan ang pagwagtang sa travel tax, ang mga programa sa turismo pondohan gihapon pinaagi sa General Appropriations Act o GAA.
Photo Courtesy: The Poor Traveler
