Mag-atubang na usab og mas taas nga galastuhan sa petrolyo ang mga motorista karong semanaha human nagpahibalo ang pipila ka kompanya sa lana og bag-ong umento sa presyo sa ilang mga produkto.
Sa managlahing pahibalo niadtong Lunes, ang umento sa presyo mahimong moabot sa, Gasoline: Php0.60 matag litro; Diesel: Php1.00 matag litro; Kerosene: Php0.60 matag litro.
Epektibo ang bag-ong mga presyo sa takna sa alas-6 sa buntag sa Martes, Pebrero 10, ug alas-4:01 sa hapon sa samang adlaw alang sa pipila ka kompanya sa lana.
Kini na ang ikalimang (5) sunod-sunod nga semana sa umento sa presyo sa gasolina, ug ikapito nga sunod-sunod nga semana alang sa diesel ug kerosene.
Wala pa’y pahibalo ang ubang kumpanya sa lana kalabot sa ilang price adjustments alang karong semanaha.
Una nang gipahayag sa Department of Energy–Oil Industry Management Bureau (DOE-OIMB) nga posibleng mag usab-usab ang dagan sa presyo sa lana, tungod sa mga timailhan sa pagluag sa tensyon tali sa Estados Unidos ug Iran, gipaabot nga igo nga global oil supply, ug nihinay nga demand tungod sa mas mild nga panahon sa Amerika.
Photo Courtesy: Philippine News Agency
