Gipasabot sa kadumalahan sa Housing and Resettlement Office (HRO) ngadto sa publiko ang ilang nag-unang mandato ug dakong responsibilidad sa pagplano, pagdumala, ug pagpatuman sa mga programa nga may kalabutan sa housing, relokasyon, ug resettlement, alang sa mga nabiktima sa kalamidad ug sa mga residente nga naapektuhan sa proyekto sa gobyerno.
Gipaklaro ni Reynaldo Roque, Department Head sa Housing and Resettlement Office-Iligan nga ilang buhatan nagpasiugda og serbisyo alang sa mga kabus, informal settlers, ug mga residente nga apektado sa peligro nga mga lugar. Lakip niini ang pag-atubang sa mga isyu sa housing ug relocation, ug pagtubag sa problema sama sa land disputes, eviction, ug relocation.
Dugang pa ni Roque, responsibilidad sa buhatan ang pagpahigayon og site inspection, investigasyon, ug pakigpulong sa komunidad aron masabtan ug matubag ang panginahanglan sa mga pamilya nga kinahanglan ipabalhin sa pinuy-anan. Apil na usab niini ang proseso sa pag-resettle sa mga informal settler families ngadto sa luwas ug angay puy-anan nga lugar.
Gipasabot usab ni Roque nga ang buhatan motabang sa pagplano sa mga estratehiya nga makatabang sa komunidad nga maka-angkon og lig-on ug long-term nga solusyon sa housing ug relocation, ug naghatag og proteksyon ug seguridad pinaagi sa mga housing programs sa lokal nga pangagamhanan sa syudad sa Iligan.
