Gipahibalo sa Social Security System o SSS Iligan City Branch ang ilang kaandam ug hugot nga pagpatuman sa Run After Contribution Evaders, o RACE, ning kasamtangang tuig, human mamatikdan ang pagsaka pag-usab sa ihap sa mga employer nga napakyas sa pag-remit sa hustong kontribusyon alang sa ilang mga empleyado sa miaging tuig 2025.
Sumala kang SSS Iligan City Branch Manager Jose Roel J. Herbieto, aktibong mobisita ang buhatan sa mga establisemento ug employers nga adunay kakulangon o wala gyud nakapasa sa kontribusyon, aron ipahimangno kanila nga nakadawat na sila og pormal nga pahibalo o notice kalabot sa ilang obligasyon sa SSS.
Gipatin-aw ni Herbieto nga ang maong pahibalo naghatag og 15 ka adlaw nga extension alang sa mga employer aron makabayad o makig-koordinar sa SSS.
Apan kon mapakyas kini sa pagbayad sulod sa gitakdang panahon, ipasa dayon ang folder sa employer ngadto sa Cluster Legal Unit sa SSS alang sa angay nga legal nga aksyon.
Bisan pa niini, gipasiugda usab sa SSS Iligan nga dili sila diretso mopadayon sa kaso kon andam motuman ang employer.
Matud pa ni Herbieto, gihatagan og kahigayonan ang mga delinquent employers nga makabayad pinaagi sa installment program, diin mahimo nilang masettle ang ilang obligasyon sulod sa 12 hangtod 24 ka bulan, depende sa kantidad sa ilang obligasyon na-utang.
Gipasidaan usab sa SSS nga ang dili pag-remit sa kontribusyon dili lamang paglapas sa balaod, kundili dako usab kini’g epekto sa mga empleyado, ilabi na sa ilang benepisyo sama sa loan, sickness, maternity, disability, ug retirement benefits.
Busa, nanawagan ang SSS Iligan sa tanang employers nga motuman sa balaod ug siguruhon ang tukmang -panahon sa pag-remit sa kontribusyon, aron malikayan ang legal nga problema ug maprotektahan ang kaayohan sa ilang mga empleyado.
