Nagpabilin ang dakong kabalaka sa publiko human sa sunod-sunod nga aksidente nga nalambigit ang mga partisipante sa BOSS IronMan Motorcycle Challenge 2026. Sa probinsya sa Bukidnon, daghang insidente ang natala diin nalambigit ang mga riders nga misalmot sa maong endurance challenge.
Ang mga panghitabo naghatag og mantsa sa tumong sa lumba ug nagpakita sa risgo nga dala niini sa mga drayber ug sa mga inosenteng naggamit sa dalan.
Gipahinumdoman sa mga otoridad nga ubos sa RA 4136 o ang Land Transportation and Traffic Code, obligasyon sa matag motorista ang pagsiguro sa kaluwasan ug ang maayong kondisyon sa panglawas sa dili pa mobiyahe.
Bisan pa man og kompleto sa safety gear ug nagsunod sa RA 10054 (Motorcycle Helmet Act) ang mga partisipante, dili ikalimod nga ang grabeng kakapoy ug kakulang sa tulog tungod sa kapin 1,000 ka kilometro nga biyahe maoy usa sa mga nag-unang rason sa disgrasya.
Samtang giila ang kahanas sa mga riders, giingon sa mga otoridad ug komunidad nga kinahanglan unahon ang prinsipyo sa “road safety first.” Kusganong gihangyo sa publiko ang mga organizers sa lumba nga repasohon ang ilang mekanismo ug pamaagi aron malikayan ang dugang disgrasya ug posibleng makalas nga kinabuhi.
Giingon usab nga ang kalsada sa Bukidnon ug sa ubang dapit dili angay himoong lumba-anan kon kini magbutang sa peligro sa kinatibuk-ang seguridad sa publiko.
Photo Courtesy: NELSON PUROL
