Giawhag karon sa Bukidnon Police Provincial Office (PPO) ang katawhan, ilabi na ang mga nabiktima sa nagkadaghan nga kaso sa kinawatay sa uling sa nagkalain-laing lungsod sa probinsya, nga moadto dayon sa pinakaduol nga police station aron i-report ang insidente.
Sumala sa Bukidnon PPO, giila na ang suspek sa serye sa pagpangawat sa uling sa Valencia City, Bukidnon, ug padayon ang ginahimo nga aksyon sa kapulisan aron dakpon ang responsable.
Matod ni PCPT Sheila Joy Jangad, spokesperson sa Bukidnon PPO, mas epektibo ang pormal nga pagreport sa kapulisan aron dayon maimbistigahan ang insidente ug mapanubag ang mga suspek. “Dili tanan reklamo nga gipost sa social media mahatagan dayong aksyon,” dugang pa niya.
Sa pikas bahin, gibutyag usab ni Barangay Kagawad Jerry Billones, Chairman sa Peace and Order sa Barangay Managok, Malaybalay City, nga alarming ang sunod-sunod nga kaso sa kinawatay sa sinakong uling sa ilang lugar. Giingon niya nga usa ka pick-up truck ang gigamit sa mga suspetsado sa pagpangawat.
Gipahimangnoan sa kapulisan ang katawhan nga magbantay ug mo-report dayon sa bisan unsang kahina-hinalang kalihokan aron mapugngan ang pagpadayon sa mga krimen.
Photo Courtesy: BUKPPO/LGU VALENCIA
