Gitakda sa Commission on Elections (Comelec) ang pagpasaka sa Certificates of Candidacy (COCs) alang sa 2026 Barangay and Sangguniang Kabataan Elections (BSKE) sugod sa Setyembre 28 hangtod Oktubre 5. Ubos sa Comelec Resolution No. 11191, nga nag-ayo sa kalendaryo sa mga aktibidad alang sa eleksyon sa Nobyembre 2, ang election period dagan gikan sa Oktubre 3 hangtod sa Nobyembre 9.
Magpabilin nga gidili sa panahon sa eleksyon ang pagdala og armas ug uban pang makamatay nga hinagiban sa mga pampublikong dapit; ang paggamit sa mga kandidato og pribadong security personnel o bodyguard; ang pag-organisar og mga reaction o strike forces; ang pag-imbestigar sa mga election officials; ug ang pagbalhin o pag-assign sa mga empleyado sa serbisyo sibil.
Gitakda usab ang panahon sa kampanya sugod sa Oktubre 22 hangtod sa Oktubre 31. Lakip sa mga gidili nga buhat niining panahona ang pagtangtang o pagguba sa mga legal nga campaign materials, paggamit og ilegal nga propaganda, ug ang paghatag og donasyon nga kwarta o bisan unsa nga materyal.
Gipahayag sa Comelec nga ang pagpangampanya, pagbaligya ug pag-inom og ilimnong makahubog, ug ang paghatag o pagdawat og libreng sakay, pagkaon, ilimnon, o bisan unsa nga butang nga adunay bili, hugot nga idili sa bisperas sa eleksyon sa Nobyembre. Ang deadline sa pagsumite sa Statements of Contributions and Expenditures (SOCE) gitakda sa Disyembre 2. Ubos sa Republic Act 12232, ang BSKE ipahigayon sa unang Lunes sa Nobyembre 2026.
Photo Courtesy: CMFR
