Padayon ang Manolo Fortich Roads and Traffic Administration (MFRTA) sa hugot nga pagpapatuman sa speed limit aron masiguro ang kaluwasan sa tanang motorista sa lungsod, ilabina sa mga dapit nga prone sa disgrasya.
Gawas sa pagpangdakop sa mga malapason sa balaod trapiko, gipakusgan usab sa MFRTA ang ilang education campaign ug ang pagpahimutang sa mga standard signage gikan sa Department of Public Works and Highways (DPWH), partikular sa Sayre Highway.
Sa pakighinabi ning sibyahan, gipadayag ni Traffic Operations Officer III Jean Paul M. Villaveto nga tungod sa maong lakang nakita ang pag-ubos sa ihap sa mga aksidente sukad niadtong Oktubre sa miaging tuig lakip ang pagkunhod sa mga traffic violations, gikan sa kapin 500 ka kaso niadtong Nobyembre, miubos ngadto sa 25 ka kaso sa Disyembre, nagpamatuod nga epektibo ang makanunayong pagbantay sa dalan sa pagdisiplina sa mga driver.
Nanawagan sab ang opisyal sa tanang lumalabay sa Manolo Fortich nga mosunod sa gitakdang speed limit alang sa peace and order ug kaluwasan sa publiko ug gipunto nga ang regulasyon dili aron maghatag og kalisod, kondili aron malikayan ang mga makamatay nga aksidente nga kaniadto komon sa Sayre Highway.
“Ang paghinay sa dagan usa ka gamay nga sakripisyo alang sa kinabuhi sa matag usa,” matod sa MFRTA.
Photo Courtesy: LGU Manolo Fortich
