Naladawat og teknikal nga tabang ug suportahan sa pagpalapad ang Geisha coffee farm sa Davao del Sur human magsugod ang Department of Agriculture sa Davao Region (DA-11) og mga diskusyon aron mapalambo ang produksyon sa taas og bili nga mga tanom ug mapalig-on ang kompetitibo nga kape sa Pilipinas sa tibuok kalibutan.
Alang sa unang Geisha coffee farm sa nasud ang Acu Geisha Farm sa Kapatagan, Davao del Sur ang planong mga interbensyon sa DA-11 diin naglakip sa pagtukod og nursery project ug pagtabang sa pagparehistro sa planting materials sa Bureau of Plant Industry (BPI).
Sa usa ka pahayag niadtong Miyerkules, miingon si Marie Ann Constantino, regional technical director for operations sa DA-11, nga ang maong lakang makatabang sa pagsunod sa balaod, pagpanalipod sa mga variety, pagsuporta sa genome sequencing, ug pagpalig-on sa panukiduki ug mga inisyatibo nga magdugtong sa lokal nga mga mag-uuma sa pagtanom og Geisha coffee.
Sumala pa ang Geisha, usa ka premium nga klase sa Arabica coffee, nga gipaila sa Pilipinas ni Taiwanese farmer Acu Sicayang, nga nagdala og mga seedling gikan sa Panama niadtong 2018.
Human sa daghang tuig sa mga hagit, eksperimento, ug pag-angay, malampuson niyang napatubo ang Geisha coffee sa yuta sa Pilipinas diin usa ka talagsaon ug mahalon nga klasi nga nindot motubo sa lokal nga kahimtangan.
Ang uma naglangkob og labaw sa pito ka ektarya ug adunay lain-laing klase sa kape sama sa Catimor ug Catura, diin upat ka ektarya ang eksklusibong gihatag alang sa Geisha coffee. Nahimutang sa 1,737 ka metros ibabaw sa dagat, ang kataas sa lugar naghatag og hapsay kaayo nga palibot aron motubo ug molambo ang Geisha coffee.
Gibutyag ni Constantino nga ang tabunok nga kabukiran sa rehiyon nagapatungha og nagkalain-laing klase sa de-kalidad nga coffee beans, hinungdan nga ang Davao usa sa mga nag-unang prodyuser sa kape sa nasud.
Si Sicayang, sa laing bahin, mipasalig nga ipaambit ang iyang kahibalo ug kalampusan sa lokal nga mga mag-uuma, ug iyang gipasiugda nga ang pagtanom og Geisha coffee nagkinahanglan og dakong pailob ug paningkamot tungod kay mas sensitibo kini kumpara sa ubang mga barayti.
Ang inisyatiba nagtumong sa pagdugtong sa lokal nga mga mag-uuma ug kooperatiba ngadto sa high-value markets ug mga network sa kahibalo.
Photo courtesy: Agri Info
