Usa ka Chinese blogger ang nakapukaw sa atensyon sa internet human iyang giangkon nga nakakuha siya og bulawan gikan sa mga daan nga SIM card ug electronic waste—nga balor kapin kuwarenta mil pesos, kapin 120,000-yuan o halos 17,000 dollars.
Sumala sa blogger nga taga-Guangdong, naka-extract siya og kapin 191 gramos nga bulawan pinaagi sa komplikadong proseso nga naglakip og kusog nga asido ug electrolytic reduction. Gi-post niya ang video nga iyang gitawag nga “SIM alchemy,” nga sama sa science experiment og shortcut paingon sa bahandi.
Tungod niini, nag sunod-sunod ang reaksyon sa social media. Anaa pa gani’y nagkomento nga, “Mas maayo pa ang usa ka tuig mangolekta og scrap kaysa napulo ka tuig manginabuhi,” ug nangayo pa og apprenticeship para matudluan sa chip alchemy.
Apan matod sa mga eksperto, hinay-hinay lang. Klaro nilang giingon nga gamay kaayo ang bulawan sulod sa usa ka SIM card. Imbis nga 0.02 gramos, mga 0.47 milligrams ra diay—pasabot, kinahanglan og kapin 400,000 ka SIM cards** para makuha ang ingon kadaghan nga bulawan nga gipakita sa video.
Sa iyang depensa, miingon ang blogger nga dili ordinaryong SIM cards ang iyang gigamit, kundili gold-plated electronic waste gikan sa industriya sa komunikasyon. Giingon niya nga tumong sa video ang pagpakita sa proseso sa recycling, dili ang pag-himo og ilusyon nga mahimong dato dayon pinaagi sa SIM card.
Samtang nagkatawa ang netizens, mipahimangno ang mga eksperto nga ang maong proseso delikado kaayo, naggamit og kusog nga kemikal nga makadaot sa lawas ug sa kinaiyahan.
Busa pahimangno sa publiko: ayaw sa sulayi ang bulawan sa SIM kung dili ka eksperto—kay basin imbes bulawan, ospital ang imong padulngan.
Photo courtesy: NewScientist
